A mund ta bindë Kurti dikë në SHBA që të investojë në Kosovë? Dy ish-Ministra flasin për Express

Vështirë se Albin Kurti do ta bindë dikë në Amerikë që të vijë dhe të investojë në Kosovë. Njohësit e çështjeve ekonomike janë pesimistë se do të dalë diçka konkrete nga vizitat e kryeministrit nëpër kompani amerikane të njohura në mbarë botën.

Është dita e dhjetë prej që kryeministri Albin Kurti udhëtoi për në Shtetet e Bashkuara. Shefi i qeverisë vizitoi kompani të njohura globalisht në Kaliforni e Teksas dhe suksesi ose mossuksesi i kësaj vizite po thuhet se do të shihet më vonë. Ish-ministri i Ekonomisë dhe Financave, Haki Shatri dhe ish-ministri i Tregtisë dhe Industrisë, Ismet Mulaj nuk presin të lëvizë diçka në ekonominë e Kosovës nga ky aktivitet i Kurtit.

Haki Shatri nuk beson se kryeministri mund të jetë shtysa vendimtare për t’i bindur korporatat e mëdha në Amerikë që të investojnë në Kosovë. Ai i quan shëtitje vizitat e Kurtit atje.

“Unë jam skeptik që do të dalë diçka prej kësaj shëtitje. Nuk e dimë as me kë ka kontaktuar… Atje ka plot korporata. Për të ardhur ata këtu, ata i kanë paratë e veta dhe shohin mirë ku duan ta angazhojnë kapitalin e tyre. Ata e kanë linjën e tyre të informimit, ambasadat, njerëzit e tyre, ata menjëherë marrin informata”, tha Shatri për Express.

Për të tërhequr investitorë të huaj, ai thotë se duhet të krijohen kushte në sundimin e rendit dhe ligjit e të sigurohet infrastruktura e nevojshme.

“Këto janë kriteret, kushtet që i kërkon një biznes i mirëfilltë”, thotë Shatri, i cili thekson se Qeveria për një vit “s’ka bërë asnjë veprim në këtë drejtim.

“Shpresa vdes e fundit”, thotë ndërkaq, Ismet Mulaj, që edhe për të është shumë e vështirë të pritet që ndonjë kompani e madhe amerikane ta zgjedhë Kosovën për të investuar. Në fushën e teknologjisë së informacionit dhe komunikimit, sipas tij, Kosova mund të jetë atraktive, megjithatë.

“Natyrisht që pa një përpjekje të madhe lobuese si dhe ofertë konkrete është e vështire që të binden për të investuar në Kosovë. Kosova është treg i vogël por në fushën e ICT mund të jemi atraktivë. Kemi një rini të trajnuar në këtë fushë si dhe flasin gjuhë të huaja. Një mundësi e mirë është edhe ITP Prizren”, tha Mulaj për Express.

Ai i konsideron me interes të veçantë vizitat e Kurtit nëpër bizneset liderë në tregun botëror pasi, siç thotë “e bën Kosovën të njohur duke i promovuar potencialet investuese në vendin tonë”.

Bizneset në teknologjinë e informacionit dhe komunikimit, Mulaj beson se kanë potencial të ofrojnë shërbime në këtë fushë.

Ish-drejtori i Odës së Afarizmit propozon “një lobim të përhershëm”.

“Kosova ende pas 21 vitesh pas luftës nuk ka arritë që ta tërheq ndonjë investitor global, prandaj një lobim i përhershëm te bizneset globale do të ishte me interes edhe në përmirësimin e imazhit të vendit dhe ekonomisë tonë në bote. Shpresoj që edhe ministrat e linjës të jenë më aktivë në këtë drejtim me qellim që vizitat e kryeministrit të jene më shumë takime konkretizimi sesa lobimi”, tha ai.

Shatri, ndërkaq, thotë se frikësohet nga qasja e kryeministrit të Kosovës.

“Është ultra e majtë. Karshi problemeve ekonomike që i ka Kosova, nuk është në frymën e amerikanizmit. Ata kanë tjetër qasje”, thotë ai.

Më herët, Shatri thotë se ka ndodhur që edhe investitorët vendorë kanë ikur prej Kosovës për të shkuar në Maqedoninë e Veriut.

Qasjen e qeverisë aktuale në fushën e ekonomisë, Shatri e konsideron “të gërditshme”, ndërsa thotë se me të, “varfëria është duke u thelluar”.