Raporti: Avionët rusë të pajisur me armë bërthamore hynë në hapësirën suedeze

Sipas një raporti, avionët sulmues rusë që mbanin armë bërthamore hynë në hapësirën ajrore suedeze.

TV4 News e Suedisë raportoi se një burim i tha se masa ishte një akt i qëllimshëm frikësimi.

Rrjeti televiziv tha se katër avionë rusë – dy avionë sulmues Sukhoi 24 të shoqëruar nga dy avionë luftarakë Sukhoi 27 – u ngritën nga baza ajrore e Kaliningradit më 2 mars. Burimet zbuluan se avionët sulmues ishin të pajisur me armë bërthamore “diçka që pilotët rusë e kishin të qartë që ta tregonin”.

Për shkak të konfliktit në Ukrainë, Forcat Ajrore Suedeze thuhet se kishin një gatishmëri të shtuar dhe mund të shihnin se pilotët po shkonin drejt qiellit mbi Gotland, një ishull suedez në Detin Baltik.

Forcat e armatosura të vendit nuk pranuan të komentojnë zyrtarisht nëse dy avionët sulmues ishin të pajisur me armë bërthamore, por i thanë rrjetit televiziv se shkelja e hapësirës ajrore duhet të ketë qenë e qëllimshme.

“Ne e vlerësojmë atë si një veprim të qëllimshëm,” tha shefi i Forcave Ajrore Carl-Johan Edstrom, raporton Sky News. “Gjë që është shumë serioze, sidomos në këtë kohë lufte”.

“Ne e kemi analizuar incidentin dhe është e qartë se nuk mund të përjashtojmë se mund të jetë një shkelje e hapësirës ajërore në menyrë aksidentale por gjithçka tregon se ata kanë shkelur qëllimisht kufijtë e Suedisë”.

Shkelja e territorit suedez zgjati rreth një minutë, shtoi raporti.

Suedia – e cila është neutrale dhe jo anëtare e NATO-s – vendosi dy avionë luftarakë JAS 39 Gripen në gatishmëri që thuhet se kanë marrë imazhe të avionëve rus që ishin të pajisur me armë bërthamore.